អាត្មា​និយម​

 អ្នកដោះលែងចាប ប្រាថ្នាគេចបាប ចង់បានសេរី
ដូចរងទុក្ខយូរ ថ្ងៃណាផុតភ័យ បើតាមសម្ដី
គ្មានសោះ​សុខសាន្ដ។

ចាបអើយហើរទៅ ទៅរកលំនៅ ទីសុខក្សេមក្សាន្ដ
សូមជួបមង្គល ចាកផុតពីឋាន ទុក្ខទោសដល់ប្រាណ
ខ្ញុំបានសង្រ្គោះ។

ឯទុក្ខទោសខ្ញុំ ប្រាកដពឹងសុំ ចាបជួយលាងលោះ
នាំទៅជាមួយ ទម្លាក់ចូលជ្រោះ កុំឲ្យមានគ្រោះ
គ្រាំគ្រាថ្ងៃក្រោយ។

ធ្លាប់​ពុករលួយ ស៊ីសព្វជំនួយ ដែលគេផ្ដល់ឲ្យ
អង្គុយលើច្បាប់ បណ្ដែតបណ្ដោយ ខុសត្រូវក៏ដោយ
ខ្ញុំជាអ្នកឈ្នះ។

ដណ្ដើមដីធ្លី ប្រវ័ញ្ចវក់វី រឹបយកទាំងផ្ទះ
អំណាចដែលមាន កុំថាឡើយព្រះ កំទេចវិនាស
បើរំខានចិត្ត។

ខ្ញុំទើបដឹងខុស ចាបជួយសណ្ដោស ឲ្យផុតងងឹត
សម្បត្តិដែលមាន ទន្រ្ទានឲ្យគិត ស្តាយក្រោយពេកពិត
ជីវិតមុននេះ។

មិនគួរនឹងធ្វើ ប្រព្រឹត្តអំពើ ដើរលើជាន់ជិះ
ស៊ីញើសឈាមគេ ខ្ញុំភ្ញាក់ពេលនេះ យកមកត្រិះរិះ
សុំ​លែងតាម​ចាប។

ខ្ញុំបន់អស់ហើយ ចាបកុំព្រងើយ ជួយសង្រ្គោះបាប
ធនធានដែលមាន លែងចាបដរាប កុំឲ្យដុនដាប
ដូចបណ្ដាសារ៕