KCD Khmer Krom

គេហទំព័រ KCD Khmerkrom សូមស្វាគមន៍ គេហទំព័រនេះត្រូវបានបដិសន្ធិឡើងក្នុងគោលបំណង ជាឃ្លាំងផ្ទុុកនូវឯកសារជាច្រើន ដើម្បីងាយស្រូលក្នុងការសិក្សាស្រាវជ្រាវនូវប្រធានបទដែលពាក់ព័ន្ធ ជាពិសេសសម្រាប់ សិស្សិ-និស្សិត ស្រាវជ្រាវទៅតាមជំនាញរបស់ខ្លួន។ គេហទំព័រ សូមធ្វើការអធ្យាស្រ័យទុកជាមុន រាល់កំហុសឆ្គងដែលកើតឡើងដោយឥតចេតនា ។ យើងខ្ញុំសូមទទួលការរិះគន់ ដើម្បីស្ថាបនា ! សូមអគុណ !

Showing posts with label ស្នេហា. Show all posts

Friday, May 20, 2016

បណ្តាំចាស់បូរាណ

ចាស់បូរាណលោកផ្តាំថា មិនឱ្យប្រតិព័ទ្ធលើស្ត្រី៧យ៉ាង ព្រោះអាចនាំទុក្ខទោសដល់ខ្លួន ៖

១, ស្រ្តីមានសម្រស់ឆើតឆាយខ្លាំងពេក
២, ស្ត្រីធ្លាប់ឆ្លងកាត់ស្នេហាច្រើន
៣, ស្ត្រីស្រឡាញ់តែមាសប្រាក់
៤, ស្ត្រីចូលចិត្តរាំច្រៀង
៥, ស្ត្រីចូលចិត្តសាក់រូបលើដងខ្លួន
៦, ស្ត្រីដែលមានអ្នកស្រលាញ់ច្រើន
៧, ស្ត្រីដែលញៀនសុរា...៕៚
.................
Khmer Saying

Sunday, January 3, 2016

ប្រការគួរយល់ដឹងមុននឹងសុខចិត្តរៀបការ

ការជ្រើសរើសគូស្រករគឺជារឿង សំខាន់បំផុតមួយក្នុងឆាក ជីវិតមនុស្សម្នាក់ៗ។ សង្គមខ្មែរឲ្យតម្លៃទៅលើការរួមរស់ប្តីមួយប្រពន្ធមួយ អស់មួយជីវិត។ ការលែងលះ គឺជាប្រការដែលត្រូវជៀសវាងឲ្យខានតែបាន ព្រោះវាមានផលវិបាកច្រើនដល់មនុស្សជំនាន់ក្រោយពោលគឺ កូនៗ។ ហេតុនេះការពិចារណាដោយល្អិតល្អន់មុនពេលរៀបការជាមួយ នរណាម្នាក់ ត្រូវតែយកចិត្តទុកដាក់ធ្វើជាចាំបាច់។ ចូរចោទសួរខ្លួនឯងនូវកត្តានីមួយៗខាងក្រោម រួចស្វែងរកចម្លើយដោយក្តីស្មោះត្រង់បំផុតចំពោះខ្លួនឯង ៖

១. តើអ្នកពិតជាយល់ដឹងពីមនុស្សដែលអ្នកស្រឡាញ់គ្រប់យ៉ាង មែនឬ? ឃ្លាន ឆ្ងាញ់ ស្រឡាញ់ល្អ ។ ពេលដែលស្រឡាញ់មើលឃើញអ្វីសុទ្ធតែល្អ។ អ្នកប្រាជ្ញាម្នាក់និយាយថា ចំពោះមនុស្សដែលយើងស្រឡាញ់ យើងតែងកុហកខ្លួនឯងពីរយ៉ាង ទី១អំពីគុណសម្បត្តិរបស់គេ និងទី២អំពីគុណវិបត្តិរបស់គេ។ គេមានគុណសម្បត្តិមិនគ្រប់គ្រាន់ក៏យើងយល់ថាល្អ គេមានគុណវិបត្តិច្រើនក៏យើងថាមិនអី។ មុននឹងសម្រេចចិត្តថារៀបការជាមួយនរណាម្នាក់ គេត្រូវពិចារណាឲ្យបានហ្មតចត់បំផុត កុំសម្រេចចិត្តឲ្យងាយៗ ដោយផ្អែកលើសេចក្តីស្រឡាញ់តែមួយមុខ។ ត្រង់ចំណុចនេះ ដើម្បីឲ្យការវិនិច្ឆ័យរបស់យើងមិនលំអៀង តោងតែយើងសំអាងលើគំនិត ឬស្តាប់គំនិតរបស់មនុស្សដែលជិតស្និទ្ធនឹងអ្នកដែលយើង ស្រឡាញ់។

២. តើស្នេហាតែមួយមុខគ្រប់គ្រាន់អាចដោះស្រាយបញ្ហាជីវិត គ្រប់យ៉ាងមែនទេ? មនុស្សមួយចំនួនច្រើនយល់ច្រឡំថាឲ្យតែស្រឡាញ់គ្នា គ្រប់គ្រាន់ហើយ រឿងផ្សេងទៀតគង់នឹងដោះស្រាយបាន។ កាលនៅស្រឡាញ់គ្នាថ្មីៗពាក្យនេះហាក់ដូចជាពិតណាស់ តែនៅជាមួយគ្នាយួរៗទៅក្តីស្រឡាញ់ក៏ចុះថយ ថែមទាំងមានសំពាធជីវិតផ្សេងទៀតដូចរឿងលុយជាដើម ភាពរកាំរកូសចេះតែកើនឡើង។ ដូច្នេះ អ្នកគួរយល់ថាស្នេហាគ្រាន់តែជាចំណែកមួយជួយគាំទ្រ ដល់សុភមង្គលតែប៉ុណ្ណោះ។

៣. តើមនុស្សយើងអាចនឹងកែប្រែបានក្រោយពេលរៀបការរួចមែនទេ? អ្វីដែលក្លាយជាទម្លាប់ហើយគឺពិបាកនឹងកែ។ កុំគិតថាគូគ្រងរបស់អ្នកអាចនឹងកែប្រែទាំងស្រុងទៅ តាមផ្លូវដែលអ្នកគិតឲ្យសោះ។ មុននឹងសុខចិត្តរៀបការ គួរសួរខ្លួនឯងថា តើចំណុចមិនល្អទាំងឡាយនោះ អ្នកអាចទទួលយកបានទេ។

៤. ខ្ញុំរៀបការជាមួយគេ មិនមែនរៀបការជាមួយក្រុមគ្រួសាររបស់គេទេ...។ តើអ្នកពិតជាត្រូវរស់នៅតែពីរនាក់ជាមួយគេដោយមិន រវល់នឹងឪពុកម្តាយសាច់ញាតិរបស់គេមែនទេ? បើអ្នកមានគំនិតបែបនេះ អាចជាកំហុសឆ្គងមួយ អ្នកនឹងរកសុភមង្គលមិនបានទេ។ ចូរសួរខ្លួនឯងនូវសំណួរដ៏ខ្លី តើអ្នកអាចកាត់ផ្តាច់ពីឪពុកម្តាយរបស់អ្នកទាំងស្រុង បានទេ? ពិតជាមិនបាន។ ដូច្នេះទាំងអ្នកទាំងគេសុទ្ធតែមិនអាចកាត់ផ្តាច់ពី គ្រួសារចាស់បាន។

៥. រៀបការហើយមនុស្សពីរនាក់ក្លាយជាមនុស្សតែមួយមែនទេ? យើង មិនអាចឃុំគ្រងមនុស្សម្នាក់ ឲ្យចំណាយពេលវេលា ឬធ្វើអ្វីៗគ្រប់យ៉ាងទៅតាមសេចក្តីត្រូវការរបស់យើង ឬស្របតាមយើងគ្រប់យ៉ាងបានទេ។ មនុស្សម្នាក់ៗត្រូវតែមានពេលវេលាផ្ទាល់ខ្លួន និងជិវិតឯកជនរបស់ខ្លួន។ ដើម្បីសុភមង្គល អ្នកទាំងពីរត្រូវចេះផ្តល់តម្លៃឲ្យគ្នា និងគោរពគ្នាទៅវិញទៅមក។

ចំណុចសំខាន់ៗមួយចំនួនទៀតដែលត្រូវយល់ដឹងមុនពេលរៀបការ

រឿងដែលស្ត្រីមិនចូលចិត្ត

- បុរសដែលផ្តោតអារម្មណ៍លើគ្រួសារចាស់ច្រើនហួសពេក
- បុរសចូលចិត្តដើរសប្បាយតែម្នាក់ឯង មិនទទួលខុសត្រូវ មិនយកចិត្តទុកដាក់នឹងគ្រួសារ
- បុរសដែលរិះគន់រឿងក្នុងផ្ទះថានាងមិនល្អ មិនពូកែ
- បុរសដែលមិនផ្តល់កិត្តិយសមិនកោតសរសើរនាង

រឿងដែលបុរសមិនចូលចិត្ត

- ស្ត្រីដែលរង់ចាំតែចាប់កំហុស មិនទុកចិត្តប្តី
- ស្ត្រីដែលធ្វើឲ្យគេអាប់មុខនៅចំពោះមុខអ្នកដទៃ
- ស្ត្រីដែលចូលចិត្តឈ្លេចសួររឿងដែលគេមិនចង់ឆ្លើយតប
- ស្ត្រីដែលរញាំរញ៉ូវ រអ៊ូរទាំងច្រើន

Saturday, December 26, 2015

ភាសាសុភមង្គល

មានអ្នកប្រាជ្ញាម្នាក់និយាយថា អាពាហ៍ពិពាហ៍ជាផ្នូរកប់ខ្មោចនៃសេចក្តីស្នេហា ។ កាលនៅជាគូសង្សារគ្នានៅឡើយជីវិតស្នេហាហាក់ដូចជាល្អូកល្អឺន ធ្វើអ្វីៗហាក់ដូចជាចុះសម្រុងនឹងគ្នា ចេះគោរពកោតចិត្តគ្នាទៅវិញទៅមក។ លុះដល់បានរៀបការជាប្តីប្រពន្ធនឹងគ្នា ហាក់ដូចជាមិនសូវផ្អែមល្ហែម មិនសូវស្អិតរមួតដូចមុនសោះ។ នៅក្បែរគ្នាជារៀងរាល់ថ្ងៃ ចាប់ផ្តើមមើលឃើញពីចំនុចអាក្រក់រៀងៗខ្លួនកាន់តែច្រៀនឡើងៗ។ ចរិតប្រកាន់ឬមិនចេះអត់ឱនឲ្យគ្នា អាចបណ្តាលឲ្យជីវិតគ្រួសារឈានទៅរកការបែកបាក់គ្នា។ នេះជាដំណើរជីវិតរស់នៅរបស់មនុស្ស។ ដើម្បីរក្សាចំណងស្នេហាឲ្យស្ថិតស្ថេរយូរអង្វែង គេគួរប្រតិបត្តិនូវភាសាប្រាំយ៉ាង។ អ្នកប្រឹក្សាយោបល់ផ្នែកជីវិតអាពាហ៍ពិពាហ៍ដ៏ល្បីល្បាញមួយរូប ឈ្មោះ Gary Chapman ហៅភាសាទាំងប្រាំនោះថាជាភាសាស្នេហា។ ក្នុងសៀវភៅ The 5 love languages អ្នកនិពន្ធពន្យល់អំពីភាសាស្នេហាទាំង 5 ដែលជួយរក្សាជីវិតស្នេហាឲ្យមានសុភមង្គលជាដរាប៖

1. ពាក្យសរសើរ៖ មានអតិថិជនម្នាក់របស់ លោក Gary Chapman មកសុំប្រឹក្សាយោបល់ពីលោក។ អតិថិជននិយាយថា ប្តីរបស់គាត់មិនព្រមជួយលាបថ្នាំបន្ទប់ទឹកសោះ គាត់បានរង់ចាំអស់រយៈពេល ៩ ខែ មកហើយ និងប្រើអស់គ្រប់វិធីតែប្តីរបល់គាត់នៅតែមិនព្រមជួយលាបថ្នាំ សោះ...។ លោក Gary Chapman សួរតបវិញថាតើប្តីរបស់លោកស្រីធ្លាប់ធ្វើអំពើល្អៗដាក់លោកស្រី ទេ? លោកស្រីនោះឆ្លើយថា ធ្លាប់ ហើយអំពើល្អរបស់គាត់មានច្រើន... ។ លោក Gary Chapman ប្រាប់ទៅអតិថិជនវិញថា ចាប់ពីថ្ងៃនេះតទៅឈប់និយាយពីរឿងលាបថ្នាំបន្ទប់ទឹកតទៅទៀត.. . រាល់ពេលដែលប្តីរបស់លោកស្រីធ្វើអ្វីមួយល្អ ចូរសរសើរគាត់និងគាំទ្រគាត់។ ឧទាហរណ៍ប្រសិនបើគាត់ជួយយកសំរាមទៅបោះចោល ចូរអរគុណនិងសរសើរទង្វើល្អនេះ ប្រសិនបើគាត់ជួយបង់ថ្លៃទឹកភ្លើង ចូរសរសើរទង្វើល្អនេះនិងបង្ហាញឲ្យឃើញថាគាត់ជាប្តីល្អ និងថាមនុស្សប្រុសទូទៅមិនសូវបានជួយប្រពន្ធដូចគាត់ទេ...។ អតិថិជនព្រមទទួលយកយោបល់នេះ តែហាក់មិនសប្បាយចិត្តសោះ ព្រោះមិនឃើញមានអ្វីទាក់ទងគ្នានឹងរឿងលាបថ្នាំបន្ទប់ទឹកសោះ ... ប៉ុន្តែគាត់ព្រមអនុវត្តន៍តាមយោបល់របស់លោក Gary Chapman។ បីសប្តាហ៍ក្រោយមក អតិថិជនរូបនេះត្រឡប់មកវិញម្តងទៀត ហើយពោលពាក្យអរគុណដោយសប្បាយចិត្តបំផុត ព្រោះប្តីរបស់គាត់បានជួយលាបថ្នាំបន្ទប់ទឹកមែន។ ពាក្យសរសើរពិតជាមានអានុភាពមែន! ពាក្យសរសើរដោយស្មោះចំពោះសេចក្តីល្អរបស់មនុស្សជាទីស្រឡាញ់មាន អានុភាពចងចិត្តជាងអ្វីៗទាំងអស់។ គេគួរទម្លាប់និយាយពាក្យសរសើរលើកទឹកចិត្តជាដរាប។

2. គុណភាពនៃពេលវេលា ៖ គុណភាពនៃពេលវេលាសំដៅលើការផ្តល់ពេលវេលាឲ្យគ្នាទៅវិញទៅមក ពោលគឺយកចិត្តទុកដាក់ទាំងស្រុងទៅលើគ្នាមិនមែនគ្រាន់តែនៅ ក្បែរគ្នាហើយធ្វើអ្វីរៀងៗខ្លួនមិនគិតគូរពីគ្នាទេ។ គុណភាពនៃពេលវេលា មានន័យថាចំណាយពេលរួមគ្នាធ្វើកិច្ចការអ្វីមួយ ចំណាយពេលនិយាយគ្នាស្តាប់គ្នាទៅវិញទៅមក ... ពេលវេលានេះគឺសម្រាប់តែមនុស្សពីរនាក់។

3. ទទួលអំណោយ ៖ មានម្តងនោះ លោក Gary Chapman បានទៅលេងផ្ទះអ្នកស្រុកម្នាក់ដែលលោកជួបដោយចៃដន្យ។ ម្ចាស់ផ្ទះបានប្រើប្អូនប្រុសឲ្យទៅឡើងបេះដូងមកទទួលស្វាគមន៍លោក Gary Chapman ។ ពេលបេះបានហើយម្ចាស់ផ្ទះកាប់ផ្លែដូងបីកាំបិតរាងជាត្រីកោណ រួចនិយាយថាលោក Gary Chapman អញ្ជើញពិសារទឹកដូង។ លោក Gary Chapman ផឹកទឹកដូងរហូតទាល់តែអស់ ព្រោះលោកដឹងថាដូងនេះបង្កប់ដោយសន្តានចិត្តស្រឡាញ់រាប់អាន។ អំណោយជារបស់ម្យ៉ាងដែលរំលឹកដល់អ្នកថា មានគេគិតពីខ្ញុំ ។ គូស្វាមីភរិយាគួរចេះរៀនផ្តល់ឲ្យគ្នាទៅវិញទៅមក ឲ្យជារបស់ ឬឲ្យជាកម្លាំងចិត្តនៅពេលដៃគូត្រូវការវត្តមានខ្លួនជាចាំបាច់ ។

4. ធ្វើកិច្ចការដែលប្តី/ប្រពន្ធចង់ឃើញថាអ្នកធ្វើ ៖ ប្តីខ្លះចូលចិត្តប្រពន្ធដែលមានចរិតជាមេផ្ទះដ៏ល្អចេះចំអិន ម្ហូប បោកគក់ខោអាវ អ៊ុតខោអាវឲ្យប្តី ... បើប្តីចូលចិត្តដូច្នេះប្រពន្ធគួរធ្វើទង្វើនេះឲ្យបានច្រើន។ កិច្ចការទាំងនេះសុទ្ធតែទាមទារនូវ គំនិត ពេលវេលា និងថាមពល តែបង្កប់ដោយក្តីស្រឡាញ់ចំពោះប្តី។ ដូចគ្នាដែរកិច្ចការណាដែលប្រពន្ធចង់ឃើញប្តីជួយធ្វើ ប្តីគួរធ្វើកិច្ចការនោះឲ្យបានច្រើន។

5. ការថ្នាក់ថ្នម ៖ ការថ្នាក់ថ្នម គឺជាភាសាមនោសញ្ចេតនាមួយបែបដែលគេទទួលស្គាល់គ្រប់ៗគ្នា។ ការថ្នាក់ថ្នមជាតាមរយៈ ការចាប់ដៃ ការឱបថើប ឬការរួមភេទ គឺមធ្យោបាយបង្ហាញពីមនោសញ្ចេតនាស្នេហារបស់ប្តីប្រពន្ធ។

Monday, December 14, 2015

ស្នេហានិងទ្រព្យសម្បត្តិមួយណាសំខាន់ជាង?

មនុស្សទូទៅច្រើនប្រៀបធៀបរវាងស្នេហា និងទ្រព្យសម្បត្តិ។ អ្នកខ្លះយល់ថាស្នេហាសំខាន់ជាងទ្រព្យសម្បត្តិ ព្រោះទ្រព្យសម្បត្តិមិនអាចទិញស្នេហា ឬសេចក្តីសុខបានឡើយ។ ប៉ុន្តែអ្នកខ្លះយល់ថាទ្រព្យសម្បត្តិសំខាន់ជាងស្នេហាព្រោះបើគ្មាន ទ្រព្យសម្បត្តិទេស្នេហាមិនអាចស្ថិតស្ថេរបានយូរទេ មនុស្សយើងនឹងត្រូវឈ្នះទាស់ទែងគ្នាដោយសារបញ្ហាខ្វះប្រាក់។ លោក ហាវ អេកឃើ អ្នកនិពន្ធសៀវភៅ អាថ៌កំបាំងចិត្តសេដ្ឋី និយាយថា ទ្រព្យសម្បត្តិនិងស្នេហា សំខាន់ដូចគ្នា គឺប្រៀបបានដូចជាដៃ ហើយនឹង ជើង គេមិនអាចថាដៃសំខាន់ជាងជើង ឬជើងសំខាន់ជាងដៃបានឡើយ។

Thursday, December 10, 2015

ធ្វើយ៉ាងណាឱ្យគេបាត់ខឹង?

តើអ្នកធ្លាប់ដែរឬទេ ដែលនៅសុខៗ ប្រុសកំពូលស្នេហ៍របស់អ្នកក៏ខឹងងរ នារីភាគច្រើឆ្ងល់ថា អេប្រុសៗក៏ចេះងរដែរឬ ព្រោះតាមធម្មតាមានតែយើងតែប៉ុណ្ណោះដែលជាអ្នកខឹងងរនឹងគេ ។

ការដែលនសរីខឹងងរង៉ក់មិមមែនជារភងធំទេ ព្រោះពេលនារីខឹងនឹងបុរស បុរសគ្រាន់តែនាំទៅមើលកុន ញុាំបាយ និងនិយាយផ្អែមល្ហែមតែបន្តិចទៅនារីៗក៏លែងខឹងបាត់ទៅហើយ ដូចេ្នះវាជារឿងតូចតាចមួយសម្រាប់បុរសៗ។ ប៉ុន្តែបើប្រុសជាអ្នកខឹងងរវិញ គឺគួរអោយខ្លាចណាស់ ព្រោះតាមធម្មតាបុរសជាភេទដែលមិនចេះខឹងងរង៉ក់ងាយៗនោះទេ ដូចេ្នះបើចង់លួងគេគឺពិបាកបន្តិចហើយ ។

បើចង់អោយបុរសៗញញឹមស្រស់ស្រាយបានដូចដើមវិញជំហានដំបូងគឺត្រូវៈ
មើលកម្រិតនៃការខឹងរបស់គេជាមុនសិន
បញ្ហានេះវាក៏អាស្រ័យទៅលើរឿងដែលគេខឹងផងដែរ តើអ្នកមានដែលធ្វើអ្វីអោយគេខឹងដែរឬទេ ដូចជានិយាយអ្វីមិនចូលត្រចៀករបស់គេ ។
បើគេខឹងរឿតូចតាចនោះមិនអី្វទេតែបើគេខឹងដោយសារឃើញអ្នកបណ្តើរគ្នានឹងប្រុសថ្មីទៅមើកុនវិញ នោះទោះជាលួងយ៉ាងណាក៏មិនបាត់ខឹងដែរ វាអាចចូលក្នុងករណីធ្ងន់ធ្ងរមិនអាចព្យាបាលបាន ( បើចូលក្នុងករណីនេះសក់អ្នកណាក្បាលអ្នកនោះហើយ ) ការដែលយើងដឹងកំរិតនៃការខឹងរបស់គេ វាធ្វើអោយយើងរកវិធីទប់ទល់និគេបាននៅពេលដែលគេកើតអារម្មណ៍មួរម៉ៅឡើងមក ។

លួងបែបរ៉ូមែនទិច
បើគេខឹងនឹងបានមួយរយៈហើយ ហើយមើទៅគេដូចជារាងបាត់ខឹងជាងមុន នោះគឺដល់ពេលដែលអ្នកត្រូវតែលួងគេវិញ ព្រោះគេអាចនឹងរវចាំថាតើពេលណាទើបអ្នកមកលួងគេ ។ អ្នកត្រូវសរសេរកំណាព្យផ្អែមល្ហែមមួយដែលពិពណ៌នាអំពីស្នេហានិងអនុស្សាវរីយ៍ល្អៗរវាងអ្នកនិងគេ ។ បើគេជាបុរសរ៉ូមែទិច ចិត្តរបស់គេឆាប់ទទួលអារម្មណ៍ណាស់ធានាថាវិធីនេះប្រាកដធ្វើអោយគេបាត់ខឹងជាមិនខាន ។

ជ្ញើរូបទៅគេញឹកញាប់
ធម្មតាមនុស្សយើងស្រលាញ់គ្នាប្រាកដជាមានអារម្មណ៍ល្អៗជាច្រើនរវាងគ្នានឹងគ្នាជាមិនខាន ក្នុងករណីនេះអ្នកត្រូវជ្ញើរូបថតដែលសិ្នទ្ធស្នាលកៀកកើយគ្នារវាងអ្នកនឹងគេ ដើម្បីឲគេដឹងថាតើកន្លងមកអ្នកទាំងពីរស្រឡាញ់គ្នាប៉ុណ្ណា ។

សម័យនេះវិទ្យាសាស្រ្តកាន់តែទំនើបកាន់តែបង្កភាពងាយស្រួលដល់មនុស្ស គឺអ្នកអាចជ្ញើរូបទៅឲគេតាមរយៈអីុមែល ឬក៏តាមរយៈទូរស័ព្ទដៃ ហើយសារភាពទោសកំហុសនឹងគេត្រង់ៗ ប៉ុន្តែមនុស្សយើងភាគច្រើពេលសារភាពកំហុស គឺមុខស្តើងខ្លាំងណាស់ មិនហ៊ានចេញទៅជួបគេផ្ទាល់ប៉ុនា្មនទេ ប៉ុន្តែមិនអីទេ បើមិនហ៊ាននទៅជួបផ្ទាល់ អាចផ្ញើសារទៅ ឬ អីុមែលទៅក៏បាន ។ បើសារភាពបែបនេះបានធានាថាប្រុសៗ១០ទាំង១០ប្រាកដជាលែងខឹងជាពុំខាន គេលែងខឹងតាំងពីឃើញរូបថតម្លេះ ។

ជ្ញើកាដូបន្តិចបន្តួចដើម្បីជាស្ពាន
ឲរបស់ដែលគេចូលចិត្ត ដូចជាសៀភៅ ឬក៏សរសេរពីអារម្មណ៍ដែលអ្នកចង់អោយគេដឹង ឬក៏ជាស្ករសូកូឡា នំ ព្រមទាំងសរសេររ៉ាយរាប់ថាអ្នកសុំទោស ហើយក៏ដឹងកំហុសហើយដែរ ។ សូមសរសេរពាក្យផ្អែមល្ហែមឲបានច្រើមិនបាច់ខ្លាចស្រមោចមករោមទេ ។ ប្រុសៗកើតជំងឺចាញ់ការអង្វរករ ការរំអួយណាស់ ទោះជាបេដូងរឹងដូចថ្ម ស្ពឹកមិនមានអារម្មណ៍ប៉ុណ្ណាក៏គង់តែទន់ដែរ ។

បុរសជាភេទមិនងាយខឹងផ្តាសទេ តែពេលខឹងក៏មិនងាយបាត់ដូចគ្នាដែរមិនដូចនារីទេ ឆាប់ខឹងឆាប់បាត់ ប៉ុន្តែក៏មិនមែនមានន័យថាលួងមិនបាននោះដែរ ។

ប៉ុន្តែបើប្រើគ្រប់វិធីហើយសង្សារបស់អ្នកនៅតែមិនបាត់ខឹងទៀត អ្នកត្រូវមកប្រើវិធីខឹងនឹងគេវិញ ព្រោះបើធ្វើបែបនេះមិនយូរទេ គេប្រាកដជាមកលួងអ្នកវិញជាមិនខាន ។

Wednesday, November 25, 2015

ខ្សែបាតដៃអាចប្រាប់ពីស្នេហានិងជីវិតអាពាហ៍ពិពាហ៍

មិនមែនមនុស្សគ្រប់គ្នាមិនធ្លាប់ទៅរកគ្រូទាយ ដើម្បីទាយមើលពីអនាគតមុខរបរឬស្នេហានោះទេ។ អ្នកខ្លះក៏កំពុងតែស្រមៃពីជីវិតស្នេហាហើយក៏ចង់ដឹងឲ្យច្បាស់ពីមនុស្សដែលត្រូវជួបពេលអនាគត។ ខាងក្រោមនេះ គឺជាខ្សែដៃ៣ប្រភេទ ដែលអាចប្រាប់ពីស្នេហា និងជីវិតអាពាហ៍ពិពាហ៍របស់អ្នក ដកស្រង់ពីប្រភពបរទេសតែប៉ុណ្ណោះ៖
១. ខ្សែបាតដៃ ទាំង២ មានកម្ពស់ស្មើគ្នា៖ អ្នកគឺជាមនុស្ស ដែលមានភាពទន់ភ្លន់ ឆាប់មានអារម្មណ៍ប្រតិកម្ម ឆ្លាត ហើយជាមនុស្សមិនចូលចិត្ត រឿងអ្វីដែលកើតឡើងភ្លាមៗនោះទេ។ បុគ្គលនេះនឹងអាចរៀបការ នៅពេលដែលមនុស្សនៅជុំវិញខ្លួនគេគិតថាល្អ និងយល់ស្រប។ វាមានន័យថា គ្រួសាររបស់បុគ្គលនោះក៏យល់ ព្រមទទួល និងពេញចិត្តគូអនាគតដែលគេបានរើសនោះដែរ។
២. ខ្សែបាតដៃខាងស្តាំ ខ្ពស់ជាងដៃខាងឆ្វេង៖ គឺជាបុគ្គលដែលត្រូវបានទទួលការស្វាគមន៍ និងជ្រុំជ្រែង ពីអ្នកដែលមានអាយុចំណាស់ជាង ហើយបុគ្គលនេះក៏អាចរៀបការជាមួយមនុស្ស ដែលមានអាយុចាស់ជាងខ្លួន។ ជាងនេះទៅទៀត គេអាចយល់ពីបរិយាកាស និងស្ថានភាពមនុស្សដែលនៅជុំវិញ បានយ៉ាងច្បាស់ផងដែរ។ តែមនុស្សប្រភេទនេះមិនសូវខ្វល់ ពីសម្តីនិងការគិតរបស់អ្នកដ៏ទៃប៉ុន្មាននោះទេ។ និយាយឲ្យខ្លីមក មនុស្សប្រភេទនេះ មិនសូវខ្វល់ពីអ្វី ដែលអ្នកនៅក្នុងសង្គមយល់ឃើញនោះទេ ពោលគឺគេតែងតែធ្វើអ្វីដែលគេចង់ធ្វើ។
៣. ខ្សែបាតដៃខាងឆ្វេង ខ្ពស់ជាង ដៃខាងស្តាំ៖ ជាមនុស្សបង្ខំពោរពេញដោយកំហឹង ចូលចិត្តការប្រកួតប្រជែងគ្នា ហើយក៏ចូលចិត្តមានស្នេហាបែបងប់ងុល ឬផ្អែមល្ហែម។ ហើយគេអាចរៀបការជាមួយអ្នកកំពុងតែរៀន (កូនសិស្ស) ឬក៏ជនជាតិបរទេស។ ភាគច្រើនតែងតែជា ស្រីស្អាត ប្រុសស្អាត។ សរុបសេចក្តីមក មនុស្សប្រភេទនេះជាមនុស្សមានភាពក្លាហាន ស្រលាញ់ការប្រកួតប្រជែង និងស្វែងរកជម្រើសដោយខ្លួនឯង៕

Friday, November 20, 2015

កំហុស១០យ៉ាងធ្វើឲ្យនារីភាគច្រើនបាត់បង់បុរសដែលខ្លួនស្រលាញ់

ស្នេហា ពេលខ្លះផ្អែមល្ហែមដូចទឹកឃ្មុំ តែពេលខ្លះទៀតបែរជាល្វីងជូរចត់ រហូតបែកបាក់គ្នាដោយសារមូលហេតុតូចមួយក៏មាន។ ក្រោយចែកផ្លូវគ្នា នារីភាគច្រើនតែងទម្លាក់កំហុសទៅលើខាងប្រុស ទាំងធាតុពិតខ្លួនឯងសោះជាអ្នកបង្កឡើង។

បើមិត្តនារីទាំងឡាយមានភាពរកាំរកូសក្នុងរឿងស្នេហា ឬកំពុងនៅឯកាម្នាក់ឯង សាកល្បងគិតលមើល៍ថាមានកំហុសទាំង១០ ខាងក្រោមឬអត់?

១. ព្យាយាមផ្លាស់ប្ដូរបុរសដែលខ្លួនស្រលាញ់

មនុស្សស្រីភាគច្រើនចង់គ្រប់គ្រងបុរសដែលខ្លួនស្រលាញ់ ចង់ឲ្យគេធ្វើអ្វីតាមខ្លួនចង់បានដោយបង្ខំ។ ចំណុចនេះមិនត្រឹមតែគ្មានប្រយោជន៍ប៉ុណ្ណោះទេ វាថែមទាំងធ្វើឲ្យទំនាក់ទំនងឈានទៅរកការប្រេះឆាទៀតផង។ បើទោះបីផ្លាស់ប្ដូរក៏មិនមែនចេញពីចិត្ត ដូចនេះគួរបង្ហាញផ្លូវហើយទុកឲ្យគេជ្រើសរើសដោយខ្លួនឯង។

២. មើលលុយធំជាងទឹកចិត្ត

លុយពិតជាសំខាន់ព្រោះអាចទិញអ្វីៗគ្រប់យ៉ាងបាន ប៉ុន្តែវាមិនអាចទិញយកសុភមង្គលបានទេ។ ត្រូវមើលទឹកចិត្តពេលដាក់បេះដូងថាស្រលាញ់បុរសណាម្នាក់ ហើយក៏មិនត្រូវចាត់ទុកលុយជាត្រីមុខដែរ ព្រោះវាអាចធ្វើឲ្យអ្នកបាត់បង់ស្នេហ៍ ទៅប៉ះចំមនុស្សបោកប្រាស់។

៣. រអ៊ូរទាំច្រើនពេក

គ្មានបុរសណាម្នាក់ អាចទ្រាំស្ដាប់ពាក្យរអ៊ូរទាំរបស់មនុស្សស្រីគ្រប់ពេលវេលាឡើយ។ មនុស្សពីរនាក់តែងមានគំនិតផ្សេងគ្នា ហើយក៏មានការគិតរៀងៗខ្លួនដែរ។ ពេលខ្លះគួរចំណាយពេលសរសើរចំណុចល្អរបស់គេជំនួសភាពរអ៊ូរទាំ នោះគេនឹងព្យាយាមកែប្រែចំណុចអាក្រក់។

៤. ប្រៀបធៀបបុរសដែលខ្លួនស្រលាញ់ជាមួយអ្នកផ្សេង

មនុស្សប្រុសរស់ក្នុងភាពប្រកួតប្រជែង តែងគិតថាខ្លួនឯងល្អជាងអ្នកដទៃ មិនចង់ឲ្យមានឈ្មោះក្នុងលេខរៀងទីពីរទេ។ ប្រសិនបើអ្នកប្រៀបធៀបចំណុចខ្សោយរបស់មនុស្សប្រុសដែលខ្លួន ស្រលាញ់ ទៅនឹងបុរសដទៃ គេប្រាកដជាអន់ចិត្តខ្លាំង។ ជាពិសេសបើយកទៅធៀបនឹងអតីតសង្សារទៀត ស្នេហាប្រាកដជាបែកបាក់លឿនបំផុត។

៥. គិតតែរឿងអាក្រក់

រករឿងមនុស្សប្រុសដែលខ្លួនស្រលាញ់ ប្រចណ្ឌដោយគ្មានភស្តុតាង គិតតែរឿងអាក្រក់ ទាំងការពិតផ្ទុយទាំងស្រុង។ ទាំងនេះ ជាមូលហេតុដែលធ្វើឲ្យស្នេហារកាំរកូសមិនចេះចប់ និងជាមូលហេតុធ្វើឲ្យបុរសម្នាក់ចាកចេញ ព្រោះទ្រាំលែងបាន។

៦. ធ្វើខ្លួនដូចព្រះនាងតូច

បុរសដែលអ្នកស្រលាញ់ចាត់ទុកអ្នកដូចព្រះនាងតូច និងអ្នកចាត់ទុកខ្លួនឯងជាព្រះនាងតូច គឺជារឿងពីរខុសគ្នាស្រលះ។ បុរសដែលអ្នកស្រលាញ់ មិនមែនជាអ្នកលួងលោម មិនមែនជាអ្នកតាមយកចិត្ត ហើយក៏មិនមែនជាអ្នកបម្រើដែរ…។ ប្រសិនបើគេចាត់ទុកអ្នកដូចព្រះនាងតូច ត្រូវគោរពគេវិញដូចព្រះអង្គ។

៧. មិនដែលទទួលយក

មិនទទួលយកអ្វីដែលបុរសម្នាក់ធ្វើ ឬសម្រេចចិត្ត នឹងធ្វើឲ្យស្នេហារបស់អ្នកបរាជ័យយ៉ាងឆាប់រហ័ស។ មនុស្សប្រុស តែងមានការគិតវែងឆ្ងាយ ហើយចង់ឲ្យគេទទួលយកគំនិតរបស់ខ្លួន ដូចនេះត្រូវចេះសម្របតាមគេខ្លះ។

៨. មិនប្រៀបធៀបភាពខុសគ្នារវាងបុរស និងនារី

មនុស្សប្រុសគិត និយាយ បញ្ចេញសកម្មភាព ឆ្លើយតប និងធ្វើអ្វីៗខុសគ្នាពីមនុស្សស្រី បើទោះបីស្ថិតក្នុងស្ថានភាពធម្មតាក៏ដោយ។ ដោយសារពេលខ្លះ អ្នកភ្លេចពីភាពខុសគ្នានេះហើយ ទើបធ្វើឲ្យបុរសដែលខ្លួនស្រលាញ់ចាកចេញទាំងមិនទាន់ដាច់អាល័យ។

៩. មិនស្គាល់តម្លៃខ្លួនឯង

រូបរាងស្អាត មានចរិតលក្ខណៈល្អ និងទេពកោសល្យពីកំណើត ព្រមទាំងមានគោលដៅច្បាស់លាស់ដើម្បីសម្រេចក្ដីស្រមៃទៅអនាគត…។ បើអ្នកល្អយ៉ាងនេះហើយ ហេតុអ្វីត្រូវបន្ទាបខ្លួនស្រលាញ់បុរសម្នាក់ដែលមិនស័ក្ដិសម? ពិតណាស់ ស្នេហាមិនប្រកាន់អ្វីទាំងអស់ ប៉ុន្តែក៏ត្រូវស្គាល់តម្លៃខ្លួនឯងដែរ។ មិនគួរបណ្ដោយឲ្យមានគម្លាតខ្លាំងពេក រហូតបុរសម្នាក់ចាកចេញទាំងនៅស្រលាញ់។

១០. នៅមិនទាន់យល់ពីអត្ថន័យស្នេហាពិត

ស្នេហាមិនមែនត្រឹមពាក្យមួយឃ្លារៀបរាប់អស់នោះទេ ហើយក៏មិនត្រឹមជាការបារម្ភ និងយកចិត្តទុកដាក់ដែរ។ ដោយសារនារីមួយចំនួន មិនទាន់យល់ពីអត្ថន័យស្នេហាពិត ទើបធ្វើឲ្យនាងបាត់បង់មនុស្សដែលខ្លួនស្រលាញ់។ ស្នេហាមិនមែនជាការនិយាយថាស្រលាញ់រាល់ថ្ងៃទេ វាជាសកម្មភាពអត់ធ្មត់ អត់ឱន លើកទឹកចិត្ត មិនអាត្មានិយម ជម្នះ និងស្មោះត្រង់…៕

Wednesday, October 28, 2015

សញ្ញា៧យ៉ាង បង្ហាញថាអ្នកកំពុងចំណាយពេលស្រលាញ់មនុស្សខុស

ពេលជួប មនុស្សដែលអ្នកស្រលាញ់ អ្នកបានបង្ហាញក្ដីស្នេហ៍តាមរយៈកាយវិការ និងចិត្តស្មោះ ហើយអ្នកក៏ចង់បានទង្វើតបមកវិញដូចគ្នា។ យ៉ាងណាក្ដី បើភាគីម្ខាងទៀតហាក់សោះអង្គើយ ឬមិនឆ្លើយតបមកវិញនូវអ្វីដែលអ្នកបានធ្វើ តើអ្នកនៅតែយល់ថា ការស្រលាញ់របស់អ្នកទៅលើបុគ្គលនោះត្រឹមត្រូវហើយមែនទេ? សញ្ញា៧យ៉ាងនេះ អាចបង្ហាញបានថា អ្នកកំពុងចំណាយពេលស្រលាញ់មនុស្សម្នាក់ខុសហើយ៖

១. មានអារម្មណ៍ថាគេមិនចាត់ទុកអ្នកជាមនុស្សសំខាន់

ដាក់ចិត្តស្រលាញ់មនុស្សម្នាក់ គឺចង់ឲ្យគេយកចិត្តទុកដាក់ និងចង់ឲ្យខ្វាយខ្វល់ពីអ្នកខ្លះដែរ ពេលខ្លះអ្នកបង្ហាញឲ្យគេដឹងពីអ្នកច្រើន តែគេបែរជាបង្ហាញនូវអារម្មណ៍ហីៗ មិនអើពើសូម្បីតែបន្តិចសោះនោះ។ បើយ៉ាងហ្នឹងៗញយដងពេក ភាគរយច្រើនណាស់គឺអ្នកស្រលាញ់គេតែម្នាក់ឯង ទាំងភាគីម្ខាងទៀតមិនអើពើនោះ ទោះបីអ្នកព្យាយាមយ៉ាងណាក៏ដោយ។

២. គេមិនដែលណាត់អ្នកទៅក្រៅ

គេមិនដែលណាត់អ្នកចេញទៅជាមួយម្ដងណាឡើយ មិនដែលហៅ មិនដែលខ្វល់…..នេះជាសញ្ញាណមួយដែលបញ្ជាក់ថាអ្នកកំពុងតែ ខ្ជះខ្ជាយពេលវេលា ស្រលាញ់មនុស្សម្នាក់ខុសហើយ។ ពេលខ្លះអ្នកអាចសាកចិត្ត ពឹងគេជួយធ្វើរឿងអ្វីបន្តិចបន្តួច ក៏ប៉ុន្តែគេមានលេសនេះ លេសនោះដោយមិនមានហេតុផលសមរម្យ…. បញ្ជាក់ថាគេមិនស្រលាញ់អ្នកស្មោះនោះទេ។

៣. គេជាមនុស្សមិនអាចទុកចិត្តបាន

បើមនុស្សស្រលាញ់គ្នាពិតមែន ប្រាកដណាស់គេមិនយកស្នេហាមកជាល្បែងលេងនោះទេ។ ពេលខ្លះសប្បាយគេមករកអ្នក ពេលមានទុក្ខធុរៈគេបែរជាគេចចេញ ចាត់ទុកប្រៀបដូចតុក្កតាគ្មានបេះដូង។ មនុស្សបែបនោះមិនគួរអ្នកដាក់ចិត្តស្រលាញ់ជាគ្នានោះគេ ខ្វះអីប្រុសពេញដី ស្រីពេញនគរ រកនរណាមួយល្អ អាចទុកចិត្តជាគ្នាបានជារឿងប្រសើរ។

៤. គេនៅតែនឹកនារកសង្សារចាស់

ពេលខ្លះគេនៅតែនឹកភ្នកដល់សង្សារមុន សំដែងកាយវិការជិតស្និទ្ធជាមួយអ្នកចាស់ដែលគេធ្លាប់សាង អនុស្សាវរីយជាមួយគេនោះក៏មាន។ ដោយកាយវិការបង្ហាញភាពជិតស្និទ្ធ ដើរលេងជាមួយអ្នកចាស់ ទិញកាដូឲ្យគេ ប្រាកដណាស់ថាអ្នកគួរដកចិត្តស្រលាញ់វិញឲ្យហើយ មុននឹងចុះកិច្ចសន្យាទឹកភ្នែក។

៥. គេមិនចង់ដឹងពីអ្នក

ទំនាក់ទំនងស្នេហាគឺត្រូវស្វែងយល់ពីចិត្តនិងដឹងពីគ្នា ទៅវិញទៅមក អ្នកព្យាយាមស្វែងយល់ពីចិត្តគេ ហើយគេក៏ព្យាយាមមកអ្នកវិញដែរ។ ប៉ុន្តែបើគេមិនចង់ដឹងពីអ្នក ហើយក៏មិនចង់ឲ្យអ្នកស្វែងយល់ពីគេច្រើននោះ គ្មានអ្វីអល់អែកទៀតទេ មិនបាច់ខាតពេលស្រលាញ់គេនោះម្នាក់ឡើយ។

៦. សកម្មភាព ឬកាយវិការសោះកក្រោះរបស់គេ

ទោះបីមានពេលខ្លះស្រលាញ់កើតពីការស្អប់ជំពប់លើក៏ដោយ ប៉ុន្តែនេះជាករណីកម្រ។ ពេលដែលអ្នកមានស្នេហាជាមួយមនុស្សម្នាក់ដែលខ្លួនស្រលាញ់ តែគេមិនចង់ឆ្លើយ មិនចង់រវល់ ជាមួយកាយវិការសោះកក្រោះពេលនៅជាមួយអ្នក ដូចមិនបាច់បន្តចំណាយពេលវេលា និងទំហំនៃក្ដីស្រលាញ់របស់អ្នកលើរូបគេនោះទេ។

៧. អ្នកតែងតែចាប់ផ្ដើមមុន

បើអ្នកតែងតែចាប់ផ្ដើមមុនគ្រប់ពេល សូម្បីតែបបួលទៅញ៉ាំអី ទៅដើរលេង មើលកុន ហើយគេមិនដែលសួរនាំឬបបួលអ្នកវិញនោះ ប្រាកដណាស់ថាអ្នកគួរពិចារណាឡើងវិញ គួរដកចិត្តវិញ។ ការសម្រេចចិត្តដកខ្លួនមុន គឺអាចជួយមិនឲ្យអ្នកឈឺចាប់ទៅថ្ងៃក្រោយដោយសារដាក់ចិត្ត ស្រលាញ់រូបគេតែម្នាក់ឯង ទាំងគេមិនស្រលាញ់ផងនោះ។

ចំណុចណាមួយត្រូវនឹង ស្នេហាដំបូងរបស់អ្នក?

ហេតុផល៦យ៉ាងដែលនារីៗច្រើនប្រចណ្ឌជាងមនុស្សប្រុស

មនុស្សស្រីតែងខ្វាយខ្វល់ និងគិតច្រើនមិនថាតែរឿងសិក្សា ឬធ្វើការនោះទេ ចំណែកឯក្នុងរឿងស្នេហានាងក៏បារម្ភច្រើនដែរ ព្រោះតែមនុស្សដែលខ្លួនស្រលាញ់។ បារម្ភ ខ្វាយខ្វល់ ស្រលាញ់ នេះហើយជាហេតុមួយដែលនាំឲ្យនាងកើតមានអារម្មណ៍ប្រចណ្ឌច្រើន ប៉ុន្តែអ្វីដែលនៅពីក្រោយចិត្តនាង? ហើយអ្វីធ្វើឲ្យមនុស្សស្រីជាច្រើនប្រចណ្ឌជាងមនុស្សប្រុសនោះ?

១. មនុស្សស្រីមានអារម្មណ៍មនោសញ្ចេតនា ច្រើនជាងមនុស្សប្រុស
មនុស្សស្រីបើស្រលាញ់មនុស្សម្នាក់ហើយគឺស្រលាញ់អស់ពី ចិត្ត និងបេះដូងតែម្ដង ជាពិសេសសម្រាប់មនុស្សដែលនាងទុកចិត្ត អាណិត និងស្រលាញ់នោះ។ នាងមានអារម្មណ៍មនោសញ្ចេតនាច្រើនជាងមនុស្សប្រុស ទោះបីមិត្តនារីៗខ្លះរឹងប៉ឹង ឆ្លាត ពូកែក៏ដោយ តែចំពោះរឿងស្នេហាគឺជាចំណុចខ្សោយរបស់នាង។ ទាំងអស់នេះហើយបានជានាងតែងខឹង ប្រចណ្ឌច្រើនមកលើមនុស្សម្នាក់ដែលនាងស្រលាញ់។

២. ភាគីខាងបុរសឧស្សាហ៍ដៀងភ្នែកមើលអ្នកផ្សេង

ជាការពិត ចរិតមនុស្សប្រុសភាគច្រើនគឺតែបែបនេះឯងហើយក៏ញយដងដែរមិន មែនតែម្តងៗទេ ឲ្យតែឃើញមនុស្សស្រីស្អាតសិចស៊ីដើរកាត់គឺសម្លឹងមើលទោះនៅ ក្បែរឬខ្លាចសង្សារក៏ឆ្លៀតដៀងភ្នែកបន្តិចដែរ។ យ៉ាងនេះហើយដែលមិត្តនារីៗ ច្រើនមិនសូវទុកចិត្ត…ហើយបើឃើញគាត់(មិត្តប្រុស) នៅជាមួយនារីផ្សេងទៀតនោះ គឺដឹងតែកប៉ាល់ភ្លើងចូលខ្លួនហើយ ដូចនេះហើយបានជានាងឧស្សាហ៍ប្រចណ្ឌមិត្តប្រុសជាសង្សារ ឬមនុស្សដែលនាងស្រលាញ់។

៣. នាងគិតថាគេមានភាពទាក់ទាញជាង

មិនដូចមនុស្សប្រុសទេ មនុស្សស្រីភាគច្រើនតែមានអារម្មណ៍អន់ចិត្តច្រើន ជាឧទាហរណ៍បើមនុស្សស្រីណាម្នាក់ឧស្សាហ៍នៅក្បែរមនុស្សប្រុសដែល នាងស្រលាញ់ឬលួចស្រលាញ់ ក្នុងក្រសែភ្នែករបស់នាងគឺគិតថានាងអន់ជាងគេ ហើយគេនោះគឺមានភាពទាក់ទាញជាង។ ហើយនេះចំណុចខ្សោយមួយដែលនាងមិនអាចមិនប្រចណ្ឌមិនបានចំពោះមិត្ត ប្រុសនាង។

៤. គិតច្រើន

សម្រាប់ប្រុសៗគឺមិនសូវជាគិតច្រើននោះទេពេលមានស្នេហា ខុសប្លែកពីនារីៗបើមានស្នេហាហើយគឺតែងតែគិតច្រើន។ នាងចូលចិត្តបង្ហាញអ្វីដែលមិត្តប្រុសខ្លួនធ្វើត្រូវឬខុស ដូចនេះហើយអារម្មណ៍ប្រចណ្ឌក៏ទៅតាមនោះដែរ…។

៥. ប្រកួតប្រជែង

មនុស្សប្រុសអាចមិនខ្វល់នឹងសំលៀកបំពាក់បាន និងមិនបាច់តុបតែងស្អិតស្អាងអ្វីច្រើន តែចំពោះមនុស្សស្រីភាគច្រើនគឺនិយមភាពស្អាតបាត ទាំងសំលៀកបំពាក់ និងការតុបតែងខ្លួន ដូចនេះសម្រស់និងរូបរាងមិនចាញ់គ្នាទេ ដូចនេះបានជាមនុស្សស្រីតែងបារម្ភខ្លាចមនុស្សប្រុសដែលខ្លួន ស្រលាញ់ងាយទោរទន់ទៅរកនារីផ្សេង។

៦. ស្រលាញ់អ្វីដែលជារបស់ខ្លួន

នារីៗចាប់តាំងពីវ័យកុមារមកគឺស្រលាញ់ និងយកចិត្តទុកដាក់ថែទាំរបស់របរណាស់ ហើយទំនោរបែបនេះគឺរក្សារហូតដល់នាងពេញវ័យ។ ដូចគ្នាទៅនឹងការថែទាំរបស់ដែរ បើសិនជាមនុស្សប្រុសម្នាក់នោះជាសង្សារនាង គឺនាងស្រលាញ់និងថែរក្សាណាស់ ដូចនេះបានជាភាពប្រចណ្ឌតែងកើតមាន…ផ្ទុយទៅវិញក្នុងន័យរក្សារបស់ មួយ បើរបស់មួយនោះមានគេចង់បានសុំពីនាង ហើយរបស់នោះធ្វើឲ្យនាងមិនចូលចិត្តគឺនាងនឹងប្រគល់ឲ្យគេតែ ម្ដង…ដូចនេះចំពោះរឿងស្នេហាបើនាងអស់ចិត្តពីបុរសម្នាក់…នាងក៏ ចិត្តដាច់ដែរ…៕

ប្រភព ៖ sabay

Friday, October 23, 2015

អត្ថន័យស្នេហានៅក្នុងអក្សរសិល្ប៍បុរាណ និងសម័យទំនើប

នៅ ក្នុងរឿងរាមកេរ្តិ៍ រឿងសាស្រ្តាល្បែងនានា ក៏ដូចជានៅក្នុងប្រលោមលោកសម័យទំនើបបញ្ហាស្នេហាជាបញ្ហាមួយដ៏ សំខាន់មិនអាចប្រកែកបាន ។ នៅក្នុងរឿងរាមកេរ្តិ៍ ព្រះរាមនិងបរិវារធ្វើសង្រ្គាមជាមួយយក្សទសមុខព្រោះតែរឿងនាងសេដា រីឯនៅក្នុងរឿងពុទ្ធិសែន ឬរឿងនាងពីរដណ្តប់ នាងកង្រីឈឺដល់ស្លាប់ក៏ព្រោះតែបាត់បុរសជាទីស្នេហា រឿងផ្កាស្រពោន របស់លោកនូ ហាច ក៏ដូចគ្នាអ៊ីចឹងដែរ ។ នៅក្នុងរឿងបីសាចស្នេហា របស់លោកញ៉ុក ថែម នាងសារុន កើតចិត្តសងសឹកចង់សម្លាប់នាងសារីជាបង ក៏ព្រោះតែចៅក្រមរ៉ប ជ្រើសរើសនាងសារី ហើយនៅទីបំផុតក៏សម្លាប់ខ្លួនតែម្តង ។ ចំពោះរឿងទំទាវ ទោះបីនាងទាវបានបោះបង់ទុំចោល ហើយទៅរៀបការជាមួយម៉ឹន ឃួន វិញក្តីក៏សម្រេចសម្រួចទៅសុខចិត្តស្លាប់ទៅតាមទុំដដែលជាដដែល បើនិយាយពីរឿងកាកីវិញ ដែលជារឿងកើតមានឡើងនៅក្នុងមជ្ឈដ្ឋានអភិជន សេចក្តីស្នេហាមានលក្ខណៈប្រាដកនិយមបំផុតគឺប្រៀបបានទៅនឹងទស្សនៈ រាមច្ចនៈមហាបណ្ឌិត ឬរបស់លោកនាគ ប្រទិព្វ អ្នកដែលបានចងក្រងរឿង ស្រីហិតោបរទេស ដូច្នេះដែរ ។

តាម ការពិតទៅរឿងស្នេហាដែលអ្នកនិពន្ធទាំងនោះបានលើកឡើងសុទ្ធតែមាន លក្ខណៈខុសគ្នាទាំងអស់ ទោះជាយ៉ាងណាក្តីគេសង្កេតឃើញថាសេចក្តីស្នេហាដែលមានថាមពល ដ៏ខ្លាំងក្លាច្រើនជាសេចក្តីស្នេហាដែលជួបនឹងឧបសគ្គ ជួនកាលទៅជាឧបសគ្គសង្គម ឧបសគ្គគ្រួសារ ឧបសគ្គនយោបាយ ប៉ុន្តែបញ្ហាស្នេហាត្រីកោណមិនសូវបានត្រូវអ្នកនិពន្ធខ្មែរលើកយក មកលាតត្រដាងឲ្យបានពិស្តារប៉ុន្មានទេ ។

តើស្នេហាជាអ្វីទៅ បានជាបង្កើតរឿងច្រើនបែបនេះ?

នៅ ក្នុងរឿងរាមកេរ្តិ៍ សេចក្តីស្នេហាកើតចេញពីសម្ផស្សដ៏អស្ចារ្យគ្មានអ្វីអាចប្រៀបផ្ទឹម បានរបស់នាងសេដា គឺជាកម្មវត្ថុនៃការប៉ងប្រាថ្នារបស់អ្នកមានរិទ្ធិអំណាច គ្មានអ្នកមានរិទ្ធិអំណាចណាម្នាក់អាចបាត់បង់នាងបាននោះឡើយ ព្រោះសម្ផស្សដ៏អស្ចារ្យគ្មានពីរនេះក៏ជានិមិត្តរូបនៃអំណាច ដូច្នេះដែរ គឺអំណាចគ្រប់គ្រងទៅលើមនោសញ្ចេតនារបស់ស្ត្រីភេទ ទន្ទឹមនឹងអំណាចអាណាចក្រទាំងមូល ។ សេចក្តីស្នេហារវាងទុំនិងទាវជាស្នេហាដែលកើតចេញពីការរំភើបទៅ វិញទៅមក គឺស្នេហាម្យ៉ាងដែលពុំអាចឋិតថេរបានឡើយកាលណារស់នៅផ្អួមជូរ ជាមួយគ្នាយូរពេក ។ យ៉ាងណាមិញសេចក្តីស្នេហារបស់នាងកាកី ទៅលើរូបស្ដេចព្រហ្មទន្ត បានរលត់ទៅវិញព្រោះតែការអផ្សុក ប៉ុន្តែបានកើតមានម្តងទៀតនៅពេលដែលនាងកាកី មានការរំភើបទៅលើសម្ផស្សនៃបុរសម្នាក់ទៀត រីឯសេចក្តីស្នេហារបស់នាងកង្រីទៅលើពុទ្ធិសែនវិញគឺជាសេចក្តី ស្នេហាដាច់ខាត គឺស្នេហាដ៏បរិសុទ្ធដែលគេនាំគ្នាចាត់ទុកថាជាសេចក្តីស្នេហាពិតប្រាកដ ប៉ុន្តែដែលគ្មានអ្នកណាអាចសម្រេចបាន ។

ចំពោះ បញ្ហាដែលចោទឡើងនៅក្នុងរឿងស្នេហានេះ គឺស្ថិតនៅត្រង់ថាតើគូស្នេហ៍អាចស្រឡាញ់អ្នកណាម្នាក់ទៀតបានទេ នៅក្នុងករណីដែលគ្មានភ័ព្វសំណាងបានជួបគ្នា? គេមិនអាចឆ្លើយនិងសំណួរនេះដោយច្បាស់បានទេ ព្រោះអ្វីៗក៏អាស្រ័យនិងធាតុព្រមទាំងលោកទស្សនៈរបស់បុគ្គលម្នាក់ ៗដែរ ប្រការដែលគួរឲ្យកត់សម្គាល់គឺបាតុភូតនៃស្នេហាតាមការពិតគឺជា បាតុភូតនៃចិត្តសាស្រ្តតែប៉ុណ្ណោះ ជាពិសេសគឺបញ្ហាសង្គមចិត្តសាស្រ្តតែម្តង ការដែលគួរកត់សម្គាល់មួយទៀតគឺស្ថានភាពបរិយាកាសដែលបង្កើតសេចក្តី ស្នេហានៅក្នុងរឿងសាស្រ្តាល្បែងជាច្រើន តួអង្គបានជួបស្ថានការណ៍ជាច្រើន ហើយស្ថានការណ៍កំសត់នីមួយៗ តែងតែនាំមកនូវសេចក្តីស្នេហាថ្មីៗទៀត ប៉ុន្តែដែលសម្រេចសម្រួចទៅ គ្រប់គ្រង់ស្នេហាណាមួយក៏មិនបានដែរបើគេចង់បានទាំងអស់នោះ ហើយនៅទីបំផុតច្រើនចេញទៅធ្វើជាតាបស់ឥសីតាំងសីលរម្ងាប់កាម តណ្ហា ឬដោះស្រាយវិបត្តិនៅក្នុងគ្រួសារ ។

នៅ សម័យយើងនេះគេសង្កេតឃើញជារឿយៗថា សេចក្តីស្នេហាច្រើនតែកើតឡើងហើយរលត់ទៅវិញ ព្រោះបញ្ហាសេដ្ឋកិច្ច បញ្ហាសង្គម បូករូមទស្សនៈអំពីជីវិតសម័យថ្មីដូចជាការអផ្សុក ការស្វែងរកការរំភើបថ្មីៗជាដើម ច្រើនតែជាកត្តាមួយដ៏សំខាន់ដែលពន្លត់ភ្លើងស្នេហាទៅវិញ បើពុំនោះសោតទេគឺជាការស្វែងរកអនាគត់ ដូចនៅក្នុងរឿងសុផាត របស់លោករឹម គិន ដូច្នេះដែរ ។ នៅត្រង់ចំណុចនេះគេអាចនិយាយបានថា អ្នកខ្លះសុខចិត្តមានវិបដិសារីជាងការសោកស្តាយ ៕

Thursday, October 22, 2015

អាថ៌កំបាំង១០យ៉ាងនៃដួងចិត្តស្រ្តី

(១) ស្ត្រីមានចរិតចូលចិត្តធ្វើការមិនចេះនៅស្ងៀមទេ

(២) ស្ត្រីមានការយកចិត្តទុកដាក់ទៅលើការងារលើសពួកបុរស

(៣) ស្រ្តីមានចិត្តអត់ធ្មត់ខ្លាំងជាងពួកបុរស

(៤) ស្ត្រីយកពេលទំនេរដើម្បីធ្វើកិច្ចការងារផ្ទះ ឯបុរសៗចូលល្បែងស្រីស្រាភ្លាម

(៥) ស្រ្តីនឹងស្លាប់បើនាងនៅទំនេរមិនធ្វើអ្វីមួយ ព្រោះយល់ថាខ្លួនគ្មានប្រយោជន៍

(៦) ស្រ្តីច្រើនមានគំនិតរីកចម្រើនទៅមុខ ឯបុរសច្រើនតែមានគំនិតថយក្រោយ

(៧) ស្រ្តីច្រើនឧស្សាហ៍ព្យាយាមជាងពួកបុរស

(៨) ស្រ្តីច្រើនតែមិននឹងនរក្នុងចិត្ត ឆាប់ប្រែប្រួល គិតច្រើន ឯបុរសគ្មានទេ!

(៩) ស្រ្តីមានចិត្តចង់ដឹងចង់ឮ ហើយចូលចិត្តប្រៀបធៀបណាស់

(១០) ស្រ្តីអ្នកមាន បើប្តីមិនឲធ្វើអ្វី គេនឹង "បំផ្លាញ" តាមបែបដើរផ្សារច្រើន ទិញឥវ៉ាន់ច្រើន តែងខ្លួនច្រើន លេងបៀ កន្ទុយលេខ....

Dr. Rollin A. Madeline ស្រង់ចេញពីសៀវភៅ អាថ៌កំបាំងអំពីស្រ្តី