ច្បាប់ពាក្យចាស់

ច្បាប់ពាក្យចាស់
១	ពាក្យចាស់ពាក្យពីព្រេង	ទោសខ្លួនឯងមើលពុំយល់
	ទោសគេតូចសោតសល់	រមិលយល់ប៉ុននឹងភ្នំ ។
	ចូលព្រៃសត្វសាហាវ	រកអំពាវគ្នាមកជុំ
	បានស្កនិងទឹកឃ្មុំ	ពួនក្នុងផ្ទះឆីម្នាក់ឯង ។
	បានហើយចង់បានទៀត	ឆ្លៀតហើយឆ្លៀតពុំគិតឈ្វេង
	មើលយល់តែមុខឯង	មិនមើលគេឯទៀតផង ។
	នឹងឆីចង់ពិសា	ខ្ជិលទំពាឲ្យម៉ដ្ឋហ្មង
	យល់នាមថាជាមង	យល់ឯជងថាជាគួយ ។
៥	យល់តាថាជាដូន	យល់ឯកូនថាជាក្មួយ
	យល់ពីរថាជាមួយ	យល់ព្រួយថាជាសុខ ។
	យល់ទោសថាជាគុណ	យល់ឯបុណ្យថាជាបាប
	យល់ល្អថាអាក្រក់	យល់លាមកថាជាផ្កា ។
	ស្លៀកស្បង់មិនកោរសក់	ឆ្លុះកពា្ចក់ធ្មេចនេត្រា
	ឃើញសេះថាជាលា	ឃើញគជាថាកណ្តុរ ។
	នេះពាក្យចាស់ពីព្រេង	អ្នកណាឈ្វេងប្រាជ្ញាយល់
	ឃើញថ្លុកថាជាថ្នល់	ក្រែងកំហល់កំហុសមាន ។
	អ្នកប្រាជ្ញាកាន់ពាក្យទៀង	កុំឲ្យល្អៀងពាក្យបុរាណ
	កុំដើរផ្លូវបំពាន	ពាក្យអ្នកចាស់សោតតែងថា។
១០	ពាក្យនេះពីព្រេងព្រឹទ្ធ	គួរឲ្យគិតពិចារណា
	កុំអាងអួតអាត្មា	ថាចំណេះចំណាំមាន ។
	ដេកយប់កុំដេកយូរ	ខ្លាចក្តីទូរជនដល់ប្រាណ
	បើឆីកុំតាមឃ្លាន	មើលប្រមាណគ្រប់គីគ្នា ។
	លើកដាក់តាមកំលាំង	កុំភើចឆាំឈឺប្រស្មា
	ប្រើគេប្រើបុត្រា	កុំសាំសួរចរចៅរ៉ៅ ។
	ទោះគិតកុំរួសរាន់	គិតឲ្យគ្រាន់ទើបដើរទៅ
	កុំឲ្យអាប់អាសៅ	កើតដំនៀលដល់អាត្មា ។
	កុំយកឆ្អិនជាឆៅ	កិច្ចក្នុងក្រៅមានតំរា
	កុំអាងអួតអាត្មា	ចេះច្បាប់ក្បួនពីព្រេងនាយ ។
១៥	ស្រដីឲ្យស្រួលស្រេច	គិតសេចគ្រេចកុំគិតងាយ
	រំពឹងគិតឲ្យឆ្ងាយ	យល់ដោយផ្លូវសព្វនានា ។
	ពាក្យព្រេងលោកស្រដី	ថាកុំបីចិញ្ចឹមខ្លា
	ពាក្យព្រេងលោកឧមា	គិតត្រង់ណាធ្វើឲ្យបាន ។
	កាន់កពស់ឲ្យខ្ជាប់	បែ្រក្រលាប់ខាំឯប្រាណ
	អូសទូកកុំឲ្យល្អាន	ចាប់ត្រីបានកុំឲ្យល្អក់ ។
	ស្លឹកឈើឥតកំរើក	នឹងកក្រើកត្បិតខ្យល់បក់
	ទឹកថ្លាល្គឹកបើល្អក់	ត្បិតរលកបោកសោះសា ។
	យល់តូចកុំអាលខំ	ទោះយល់ធំកុំអាលថា
	បានច្រើនកុំខំពារ	ឲ្យសន្សឹមសៀរតិចទៅ ។
២០	អ្នកមានរក្សាខ្សត់	ដូចសំពត់ព័ទ្ធពីក្រៅ
	អ្នកប្រាជ្ញរក្សាខ្លៅ	ដូចសំពៅនៅសំប៉ាន ។
	អ្នកខ្ពស់រក្សាទាប	ដោយសុភាពធម៌បុរាណ
	អ្នកឆ្អែតរក្សាឃ្លាន	នាអ្នករុងរក្សាឆ្មារ ។
	រក្សាទៅមុខវឹង	ឥតក៏ដឹងអស់អម្បាល
	ចំណេរចិរកាន់កាល	ដូចរបងស្រាស់បន្លា ។
	កុំឆីឆ្អែតតែឯង	ពុំគិតក្រែងអស់គ្នីគ្នា
	គេឃ្លានផ្ទៃខ្លោចផ្សា	គេឆីរ៉ាបានឆ្អែតផង ។
	កុំមានចិត្តពភ្លើ	ពឹងក្រពើឲ្យចំលង
	កុំកាច់អុសរបង	វាំងចំណារឯអាត្មា ។
២៥	មានទូកឲ្យមានថ្នោល	មានបង្គោលព្យួរយុថ្កា
	ទាំងចែវទាំងច្រវា	ក្រជីងចាប់ដោយនូវគ្រប់ ។
	ប្រយ័ត្នក្រែងព្យុះខ្យល់	បក់មកដល់នឹងទល់ទប់
	ប្រយ័ត្នប្រយោជន៍គ្រប់	ទើបហៅថាមានគំនិត ។
	ពាក្យព្រេងគិតគួរចាំ	ជាបណ្តាំប្រដៅចិត្ត
	ពាក្យព្រេងពាក្យព្រេងព្រឹទ្ធ	គួរឲ្យគិតៗឲ្យគ្រាន់ ។
	ពាក្យនេះទុកជាច្បាប់	ជាសន្តាប់ទៀងជាក់ស្យាន់
	ពាក្យនេះជាកំណាន់	កំណត់នៅឥតឃ្លាតឃ្លា ។
	សូរេចនូវនិទាន	ពាក្យទូន្មានដោយប្រការ
	អម្បាលនេះឯងណា	ចូរចងចាំរៀងទៅហោង ។